معاناة ذبابة

معاناة ذبابة
جتني ذبابه تشتكي دوخة الراس
ودموعها بالخد مثل السحابه
تقول يا(...)خذو نفسي الناس
ارجوك شوف الجرح ينزف صوابه
نظرت..شفت الجسم بالدم محتاس
غادي من الضربات مثل الخرابه
وجناحها كنه مقطع بالامواس

واحد(فغصها) يوم خشت ثيابه
جبت الطبيب وشافها قال ماباس
تحتاج للتنويم تحت الرقابه
وان مانفع لازم تعالج بتكساس
يمكن علاج الغرب يشفي ذبابه!!
ونومتها شهرين مرت بالافلاس
وعلاج روتيني دفعنا حسابه
رحت"الخطوط" وقلت لي وضع حساس
عندي مريض اطلب سريعآ اركابه
قالو بعد بكره تجينا على ساس
يجي المدير المعتمد بالنيابه
جيت ولقيت انسان ماعنده احساس
لاخلق..لامنطق..مضيع ادابه
قال اكتب اللي تطلبه فوق قرطاس
واسمك رباعي حيث الاسماء تشابه
وعشرين صوره كل صوره لها اقياس
وعشرين صوره مكبره للذبابه
وحاولت ادبر"واسطه" من بعض ناس
وارسلت له مخلوق ثم اعتزابه
واكد لنا الرحله بعد شق الانفاس
وجرح الذبابه زايدن بالتهابه
رحنا "امريكا" وامرنا صار منحاس
واذا سألنا حيرتنا الاجابه
وسألت عن دكتور يجلى للاعماس
وقالو "بلهجتهم" ترى ذاك بابه
ساعة وصلت الباب قابلت حراس
الكل منهم مابصدره رحابه
وبكل شده دخلونا بعد ياس
على طبيب مجمعن له عصابه
شفت الخطر يضرب نواقيس واجراس
في كل شي اشوف لون الكآبه
وعدنا الرياض مربية كل قرناس
دار السعود اهل الكرم والمهابه
الطب فيها زاد عن كل مقياس
مالي ومال الغرب وش في جنابه؟!!


المصدر: معاناة ذبابة
منقول للفائدة